+ የዘገየህ ምነው?+

እስራኤል ዘነፍስን~ ከኃጥያቱ ቀንበር
እስራኤል ዘስጋን~ ከ ምድር ቸነፈር
ያዳንሃቸው መሲዕ~አንተ ብላቴና 
እኛንም አድነን~እባክህ ቶሎ ና
አየህ ብላቴናው፡

ሰማይ ተለጉሞ
ምድር ሆዷ ታሞ

በደረቀ ማሳ~በደረቀ ተስፋ
ሺ ወይፈን~ተኝቶ ቀኑን እየገፋ
ምነው ምን በደልንህ~ድምፅህ ሁሉ ጠፋ
…………
አየህ ብላቴናው፡

የረሃብ ሰቀቀኑ 
የችግር ዲደኑ
አብሮን ቢራመድም~እኩል ከዘመኑ
አራሽ ገበሬ ግን~አልተወም መጥመዱን
በደከመ በሬ~በደከመ ወይፈን፤
…..
እኒያም ምስኪን በሬዎች፡ 
ሳይፈቅዱ ተወልደው
ሳይወዱ ተጠምደው
ከማሳው ተኝተው~ይኸው ስራ ፈቱ
የሚላስ ልመና~ወደ አንተ ቃተቱ
……..
እንዲህ እየሆነ 
እንዲያም እየሆነ 
የትናንት ማንነት እየመነመነ
በሬዎች ደከሙ~ቀንበሩ ከበደ 
በኮሩ መሳሳት~ጫንቃቸው ነደደ
በገራፊው ጉልበት~ጀርባቸው ተላጠ
በመንበርከክ ብዛት~እግራቸው ጎበጠ
…..
እናም አንተ መሲህ
ስማን ከወዴት ነህ?
እንዴት ዝም ትላለህ? 
ይሄን ሁሉ እያህ፤

የዘገየህ ምነው?
አራሹን ተው በለው~ወይ በሬውን ፍታው
~~~~~~~~~~~~~~~~~~~~~~~~

[ዘላለም☞የእናቱ ልጅ]; January 14, 2016