እንዴት አሉ ጃንሆይ?
ሰላምታ አቅርበናል~ወደ አሉበት ሰማይ
ዓለም ለሚያከብረው~ለ ክቡር ልደትዎ
ከ ኬኩ ባይቀምሱም~እንኳ አደረሰዎ
እንኳን የእኛ ሆኑ!
………እንኳን ተወለዱ!
እኔ ምለው ጃንሆይ፡
እንዴት ነው ሰማይ ቤት?
ከ ወዴት ከተሙ ሲኦል ወይስ ገነት?
እኛም ጃንሆይ
40 አመት ተደፍተን~መሬት መሬት ስናይ
በ አንድ ጩሊሌ አሽከር~እርስዎ ቢሰረቁ
ሹማምንቱ ሁሉ~ከ እንቅልፋቸው ነቁ
እኛ
ህዝቦችዎ፡
ማት ይወርዳል ብለን~ሰማይ ሰማይ ስናይ
ጩሊሌው ቁጭ አለ~ከ እርስዎ ዙፋኑ ላይ
ከዚያማ ጃንሆይ፣
ለ “ሺ ዓመት ንገሱ” የቀመርነው ዜማ
በ ተራማጅ መዝሙር~በአብዮት ተቀማ
የፈራነው መዓት~መጣ አረፋፍዶ
ስለቱን አሹሎ~ጅራፉን ገምዶ
በሀዘን አስነባት~ይችን ምስኪን ሀገር
ልጆቿን በላባት~የ አብዮት መቃብር
ኧረ ተውኝ ጃንሆይ!
አዲስ ነገር የለም~በ ኢትዮጵያ ሰማይ!
ያውናት ይች ሀገር~ተሽሎም አልተሻላት
እባክዎት ጃንሆይ፣
ያገኙት እደሆን፣ ጌታን ይለምኑት!
እኔ ምለው ጃንሆይ!
ሰፈሩ ወዴት ነው~ የመንግስቱ ንዋይ?
ያን በላይ ዘለቀን~አይተውት ያውቃሉ?
አሁንም ጀግና ነው~እንዴት ነው አመሉ?
እርስዎን ሲያገኝስ~ሰላም
ይልዎታል?
ነው ስራዎን አውቀው~ፈርተው ይሸሹታል?
ማን ነበር ያ ጀግና~ዮፍታሄ
ንጉሴ?
ቴአትር ያዘጋጃል~ለእግዜሩ
ውዳሴ?
እባክዎ ጃንሆይ፣ ዮፍታሄን ሲያጉኙት
‹‹ተፋጀን›› ሚል ተውኔት፣ ላክልን ይበሉት፤
ያች ብላቴናስ~ዋለልኝ እንዴት ናት?
ከልብ ትሰማለች~አሁንስ ሲመክሯት?
ያች አቤ ጉቤኛስ~የለውጧ መሰላል?
መፅሐፍ አሳተመች፣ “ተወለድሁኝ” የሚል፤
ከንኩርማህ ጋራስ ትገናኛላችሁ?
ስለ ጥንቱ ትግል~ምን ምን አዎራችሁ?
እኛማ ጃንሆይ፣
ለ ንኩርማህ ክብር~አንድ ሐውልት አቁመን
ሽቅብ እያየነው~ኤሎሄ እንላለን!
‹‹የኋላው ከሌለ…›› ሚል ትውልድ ሲጣራ
የእርስዎም
‹‹ጃ›› ሐውልት~ታስቧል ሊሰራ
ባይሆን
ስንመርቀው~እንዲመጡ አደራ!
ጃንሆይ ይቅር በሉኝ!
የልጅ ነገር ሁኖ~ጥያቄ አበዛሁኝ
ያ ጀግናው ቴዎድሮስ~እንዴት ናት ሽጉጡ?
ሽፍታ ያድናሉ~አሁንም እየወጡ?
እምዬ ምኒሊክ~እን’ዴት ነው ደግነቱ?
ያች የሸዋ መርፌስ~እንዴት ናት እጣይቱ?
አፄ ዮሐንስስ~እንዴው እንዴት አሉ?
ከንጉስ ሚካኤል~ጋር አሁንም ያወራሉ?
እኛማ ጃንሆይ፡
እጅ ንሱ ስንባል~ለክብራችሁ ስንሰግድ
ወደፊት ስንባል~እ’ልፍ ስንራመድ
የነገሰው ሁሉ~እንደ ነዳን ስንሮጥ
ፀሐይ ነው ስትሉን~ጨለማ ውስጥ ስንዘቅጥ
አንዱ የሰራውን~አንደኛው ሲንደው
የ አንደኛውን እውነት~አንደኛው ሲሽረው
ያላፊውን መንገድ~ባ’ለጊዜ ሲያፈርሰው
አለነ
በጅምር!
ከ‹‹ትናንት››
ተጣልተን ‹‹ነገ››ን ስናፈቅር
ኧረ ተውኝ ጃንሆይ!
አቤት
የኛስ ስቃይ!
መላ ቅጡ ጠፍቶን~አለን በ ጎዳና
ኃጢያታችን ጋርዶት~እግዜር መች አየና?
ፍረዱን እናንተ~ይፍረደን ደመና
መንገዱን አሳዩን~በ አንድ ምከሩና
ታርቃችሁ አስታርቁን~በአንድነት
እንፅና!
==========================================================
© 2009 ዓ.ም
(መልካም
ልደት
ጃንሆይ!)
No comments:
Post a Comment