ለ "አንቺ ያለኝ ፍቅር"

ለፍቅርሽ ጥልቀት

ለ ሰብዕናሽ ምጥቀት፤

ብራና ዳምጬ

ቃላትን መርጬ

ብዕሬን ጨብጬ፤

በሰከነ መንፈስ~ልፅፍ አስብና

ፈዝዠ እቀራለሁ~ሐሳብ ሁሉ መና

ማይጨበጥ ነፋስ~የቅዠት ደመና

ግራ ይገባኛል~ምን ላድርገው ደግሞ

እምባዬ ይፈሳል~ከብዕሬ ቀድሞ፤

ቃላትን ላጣምር~የያዝኩት ወረቀት

ቀለም እና እምባ~በ አንድ ተዋህዶበት፤

ባህርን ይፈጥራል

መናኛ ሐሳቤም~ሰጥሞ ይጠፋኛል፤

ባህሩን አስሼ 

አድማስ አዳርሼ፤

በ አንካሳ ፊደላት~ቃላትን ልቆጥር

ስለ ፍቅርሽ ልፅፍ ፍ…ብዬ ስጀምር፤

ደግሞ ከ ወደ ውስጥ~ቁጣ ይሰማኛል

ብኩን ህሊናዬ~እንደዚህ ይለኛል፤

“ምንስ ጠቢብ ብትሆን~ፊደላት ቢተርፉህ

ፍቅርን በቃላት~እንዴት ትገልፃልህ?”

እያለ ይለኛል

ግራ ይገባኛል፤

ግን እኮ አንቺን…….

ግን እኮ አንቺን…….

ቃላት ባይገልፁትም~የፍቅርሽን ጥልቀት

ልብሽ ባያውቀውም~የእምባዬን እውነት

አንድ እውነት ልንገርሽ

ካዳመጠኝ ጆሮሽ?

ፀሐይ ብትጨልም~ከዋክብት ቢረግፉ

የ ምድር ባህሮች~አፍላጋት ቢነጥፉ

ሰማይ እና መሬት~በ አንድ ቢዋሃዱ

ከሰማይ ‘ሳት ወርዶ~ፍጥረታት ቢነዱ

ተፈጥሮ ቢከዳኝ~ሁሉም ቢቀያየር

በ ዘመን አይከስምም~ለ አንቺ ያለኝ ፍቅር

  (ለ አንቺ…. ታህሳስ 28 & የካቲት29፣ 2008 ዓ.ም)

(ሳይኖሩ ለልጆቻቸው ለሚኖሩ ውድ የ ዓለም ጀግና እናቶች መታሰቢያ ይሁንልኝ)